Жардыруудан көз жумган Руслан Абасовдун өлүмү боюнча кылмыш иши козголду, тергөөнүн жүрүшүндө тааныштары суракка алынат

“Унаасындагы жардыруудан кийин өзүнө келе албай каза тапкан кикбоксчу Руслан Абасовдун өлүмү боюнча кылмыш иши козголуп, жакын тааныштары суракка алынат”,- деп билдирди Чүй ОИИББинин кызматкери Нурбек Токтосунов. 

Анын айтымында, кикбоксчунун туугандарын жана досторун суракка алуу боюнча жана окуянын себептерин билүү үчүн тийиштүү экспертизалар дайындалган. “Азыркы тапта тергөө тобу иликтөө иштерин жүргүзүп жатат. Бардык тааныштары менен сүйлөшүп, анын кимдер менен тыгыз байланышта экенин билген соң маалымат берилет”,- деди ал.

Кечээ, 27-мартта спортчу жубайы экөө унаада Токмок шаарындагы 1-кичи райондон 3-кичи районду көздөй бара жатканда бурулуш жерден жардыруу болгон. Жардыруудан жаракат алган кикбоксчу Руслан Абасов ооруканага жетип каза болгон. Ал эми келинчегинин абалы канааттандырарлык, учурда дарыгерлердин көзөмөлүндө.