Бишкекте мас абалындагы милиционер май куюучу жайды сүзүп, 3 адам жаракат алды

Бишкекте мас абалындагы айдоочу май куюучу жайды сүзүп, дагы бир унаа менен кагылышып кеткен. Жол кырсыгы бүгүн, 29-мартта түнкү саат 2лер чамасында Шабдан баатыр жана Горький көчөлөрүнүн кесилишинде катталган. 

Хонда Аккорд унаасы түндүккө карай катуу ылдамдыкта бара жаткан. Ал рулду башкара албай "Petroleum" май куюучу жайын сүзүп, бензин куюп жаткан БМВ унаасы менен кагылышкан. БМВнын айдоочусунун буту машинасы менен бензоколонканын ортосунда калган. 

“Кырсыктан кийин 3 адам ооруканага кайрылган. Хонда унаасынын айдоочусу Ленин райондук ички иштер башкармалыгынын аймактык тескөөчүсү экени аныкталды. Жол-кайгуул кызматы тарабынан протокол түзүлдү. Ички коопсуздук кызматы иликтөө иштерин жүргүзөт”,- деп билдирди Жол-кайгуул кызматынын басма сөз катчысы Тилек Оторов. 

Соңку мезгилдерде МАИ кызматкерлеринин катышуусундагы чыр-чатактар коомчулукта талкууга алынып келет. Март айынын ортосунда социалдык тармактарда кичинекей уулунун көзүнчө атасына зомбулук көрсөткөн видеожазуу тараган. 

Ал окуя боюнча тергөө жүрүп, МАИ кызматкери эскертүү алуу менен чектелгени айтылган. Ал эми"баш ийбеди" деп инспектор тарабынан жерге жыгылтылган жарандын иши сотко өткөн. "Мыйзам баарына бирдей болушу керек" деген укук коргоочу уулунун көзүнчө атасына кол көтөрүп, баласына психологиялык зыян келтиргенин эске алуу менен МАИчи жоопко тартылышы керек деген оюн билдирген.