УЕФАнын Чемпиондор Лигасы: ПСЖ өз үйүндө “Челсини”, “Реал” дортмунддук “Боруссияны” кабыл алат

Бүгүн, 2-апрелде УЕФАнын Чемпиондор Лигасынын чейрек финалдык оюндары орун алат. Анда франциялык ПСЖ өз үйүндө англиялык “Челсини” кабыл алат. Ал эми мадриддик “Реалга” дортмунддук “Боруссия” “конокко” келет. Бул тууралуу УЕФАнын расмий сайты билдирет. Беттештер Бишкек сааты боюнча 00:45те старт алат.

Башкы машыктыруучулардын бүгүнкү оюндар тууралуу пикирлери

КАРЛО АНЧЕЛОТТИ, “Реалдын” башкы машыктыруучусу:

- Менин оюмча, “Боруссия” УЕФАнын Чемпиондор Лигасында утулуп калууга даяр эмес. Анткени Германиянын Бундеслигасында чемпиондук жарыштан четтеп калганы аларды Чемпиондор Лигасында күчтүү ойноого түртүп жатат. Дортмунддуктардын чабуулчулары жогорку класста жана каршы чабуулу өтө кооптуу. “Боруссияны” утуш үчүн “Реал” ишенимдүү футбол алып барышы керек.

ЮРГЕН КЛОПП, “Боруссиянын” башкы машыктыруучусу:

- “Реал” коргонууда да, чабуулда да мыкты ойногон команда. Мадриддиктер алып барган оюндун ылдамдыгы жогору. “Боруссия” өткөн жылы “Реалдын” жолун тосо алган. Быйыл да ошол жетишкендикти кайталоого аракет кылабыз.

ЖОЗЕ МОУРИНЬЮ, “Челсинин” башкы машыктыруучусу:

- ПСЖнын чабуулдук бөлүктө кемчиликтери жокко эсе. УЕФАнын Чемпиондор Лигасынын бул баскычында чабуулда ойногон футболчулар көп нерсени чечет. Атаандаштардын курамында Златан Ибрагимович, Эдинсон Кавани, Эсекьель Лавеccи сыяктуу тажрыйбалуу оюнчулар бар. Бул оюнчулар оюндун тагдырын чечиши мүмкүн.

ЛОРАН БЛАН, ПСЖнын башкы машыктыруучусу:

- “Челси” менен ПСЖнын оюнунда чоң айырмачылык бар. “Челси” каршы чабуулга басым жасайт. ПСЖ болсо топту көбүрөөк көзөмөлүнө алууга аракет кылат. Биз өз күчүбүзгө ишенебиз.