Криштиану Роналдунун голунан кийин комадан чыккан Давид кумири менен жолукту

Мадриддик “Реалдын” жана Криштиану Роналдунун польшалык күйөрманы, өткөн жылы Роналдунун голунан соң комадан чыккан Давид Павлашчик кумири менен жолугушту. Бул тууралуу бүгүн, 7-апрелде чет элдик маалымат булактары кабарлады.

Маалыматка ылайык, 2013-жылдын август айында 14 жаштагы Давид Павлашчикти унаа коюп кетип, ал комага түшүп калган. Дарыгерлер анын жашап кетерине үмүт артышкан эмес. Ал эми Давиддин ата-энеси уулун башка ооруканага котортушуп, дарыгерлердин кеңеши менен уулу жаткан бөлмөгө ал жакшы көргөн нерселерди жайгаштырышкан. Анын ичинде “Реалдын” сүрөттөрү илинип, сыналгыдан Криштиану Роналду ойногон оюндар түз көрсөтүлгөн.

2013-жылдын 18-ноябрында 3 ай бою комада жаткан жеткинчек бала Португалия-Швеция беттешинде Криштиану Роналду гол киргизгенде эсине келген.   

Польшалык басылмалар бул окуяны жазып чыгышкан соң, Криштиану Роналду күйөрманы Давидди “Реалдын” УЕФАнын Чемпиондор Лигасында “Боруссияга” каршы оюнуна чакырган. Жолугушуу учурунда футболчу жаш күйөрманына өз футболкасын белек кылганы маалым болду.