Журналист Геннадий Павлюктун өлүмүнө шектелип кармалган УКМКнын эки кызматкери эки айга камалды

Журналист Геннадий Павлюктун өлүмүнө шектелип кармалган УКМКнын эки кызматкери эки айга камакка алынды. Бул тууралуу УКМКнын басма сөз кызматы бүгүн, 9-апрелде билдирди.

Маалыматка караганда, мындай чечимди Октябрь райондук соту чыгарган.

Айта кетсек, 7-апрель күнү "журналисттин өлүмүнө катыштыгы бар" делинип УКМКнын эки кызматкери кармалган эле.

Эске салсак, 2009-жылдын 16-декабрында кыргызстандык журналист Геннадий Павлюк киши колдуу болуп, оор абалда Алматыдагы ооруканага түшкөн. Журналист бир апта ооруканада дарыгерлердин көзөмөлүндө болуп, эсине келе албай жарык дүйнө менен кош айтышкан. Бул иш боюнча 2011-жылдын 10-октябрында Алматы райондор аралык соту тарабынан Павлюктун өлүмү боюнча КРнын УКМКнын мурдагы кызматкери А.Исманкулов, Казакстандын жараны А.Игиликов жана Ш.Орозалин сот жообуна тартылган.