“Түштүк Кореянын жаранын тоногон” деп шектелип жаткан аскер кызматкерлеринин иши Аскер прокуратурасына өткөрүлүп берилди

“Түштүк Кореянын жаранын тоногон” деп шектелип жаткан аскер кызматкерлеринин иши Аскер прокуратурасына өткөрүлүп берилди. Бул тууралуу бүгүн, 14-апрелде Кыргызстандын Куралдуу күчтөрүнүн Генералдык штабынын башчысы Асанбек Алымкожоев Жогорку Кеңештин Коргоо жана коопсуздук комитетинин көчмө жыйынында кабарлады.

Эске сала кетсек, 19-марттан 20-мартка караган түнү саат 01:30 чамасында Бишкек шаарынын Тынчтык проспекти менен Фрунзе көчөсүнүн кесилишиндеги “Люкс” караоке-клубуна бет капчан адамдар кирип келишип, Корея Республикасынын А.Е. аттуу жаранын коркутуп, 3000 доллар акчасын жана 6 даана уюлдук телефонун алып кетишкен.

Бул кылмышка шектелип төмөндөгү жарандар кармалышкан:

- Т.Канат, 39 жашта, Ысык-Көл облусунун тургуну. Ал Бишкек шаарындагы Аскер бөлүктөрүнүн биринин сержанты болгон.

- К.Адилет, 25 жашта, Нарын облусунун тургуну. Ал Бишкек шаарындагы Аскер бөлүктөрүнүн биринин сержанты болгон.

- И.Асет, 23 жашта, Чүй облусунун тургуну. Бишкек шаарындагы Аскер бөлүктөрүнүн биринин кичи сержанты болгон.

- Б.Мирлан, 24 жашта, Нарын облусунун тургуну. Убактылуу иштебейт.

- Бекболот, 23 жашта, Нарын облусунун тургуну. Убактылуу иштебейт.

Учурда КРнын Кылмыш-жаза кодексинин 168-беренеси (каракчылык) боюнча кылмыш иши козголуп, тергөө амалдары жүрүп жатат.