“Супер-Инфо” гезити телеалпаруучу Назира Айтбекованы тамашага салган кабарчылардын атынан кечирим сурайт

Телеалпаруучу Назира Айтбекованы тамашага салуу башкы редактор жана шеф-редакторлор менен макулдашылгандыгы чындык. Бирок гезит жетекчилиги “Тамаша тордо” каармандарды катаал тамашага салбоону, катуу коркутпоону, алардын өмүрүнө коркунуч келтирбөөнү талап кылган. Бул окуяда аталган тамашаны даярдаган эки кабарчы гезит жетекчилиги тарабынан берилген эскертүүлөрдөн четтеп, өз билемдикке барышкан. Учурда окуя боюнча кызматтык териштирүү жүрүп, мыйзам эрежелерине ылайык чара көрүлдү. Укук коргоо органдары дагы мыйзам чегинде териштирүү жүргүзөт деп ишенебиз. Телеалпаруучу Назира Айтбекованын абалын түшүнүү менен кабыл алуудабыз. "Тамаша торго" жамынып, адамдардын өмүрүнө коркунуч келтирүүгө “Супер-Инфо” эч бир кызматкерине укук берген эмес, бербейт дагы. Андыктан "Супер-Инфо" гезити өз билемдикке барган кабарчылардын атынан Назира Айтбековадан кечирим сурайт.