“Бишкекте 20 жаштагы жигитти уурдап, ал үчүн 70 миң сом талап кылган” деп шектелген 4 жаран кармалды

“Бишкекте 20 жаштагы жигитти уурдап, ал үчүн 70 миң сом талап кылган” деп шектелген 4 жаран кармалды. Бул тууралуу ИИМдин басма сөз кызматы кечээ, 16-апрелде билдирди.

Маалыматка караганда, 13-апрель күнү милиция кызматкерлерине маалымат келип түшкөн. Анда 1994-жылы туулган жарандын дайынсыз жоголгондугу айтылган. Иликтөөнүн жүрүшүндө ошол күнү саат 18:00 чамасында белгисиз адамдар 20 жаштагы уланды унаага салып кетишкени маалым болгон. Кийин кылмышка шектүүлөр жабырлануучунун апасына уюлдук телефон аркылуу чалышып, баласы үчүн 70 миң сом талап кылышкан. Мындан улам барымтадагы баланын апасы алардын айтканына макул болуп, белгиленген жерге акчаны жеткирип берүү боюнча сүйлөшүшкөн. Бул учурда милиция кызматкерлери да бирге барышып, кылмышка шектүүлөрдү кармоо аракети жүргөн. Мунун натыйжасында кылмышка шектелип Кочкор районунун 4 жараны кармалды.

Учурда “адам уурдоо” беренеси боюнча кылмыш иши козголуп, тергөө амалдары жүрүп жатат.