Зардалыда кырсыктаган балдар жарылуучу затты жергиликтүү тургундун чөпканасынан таап алышкан

Баткен районундагы Кара-Бак айыл аймагынын Зардалы айылында жарылган зат жергиликтүү тургун Сангимов Махаматтын чөпканасынан табылган. Бул тууралуу бүгүн, 18-апрелде КРнын ӨКМнын басма сөз кызматы билдирди.

Белгилүү болгондой, 2014-жылдын 17-апрели күнү саат 19:25те КРнын чек ара кызматынын №2022-аскер бөлүгүнүн ыкчам кезметчиси тарабынан КР ӨКМнын 3-издөө-куткаруу отрядынын ыкчам кезметчисине белгисиз зат жарылгандыгы тууралуу маалымат берилген.

Эске салсак, жарылуу 17-апрель күнү Зардалы айылындагы “Коргон” чек ара заставасында болгон. Белгилүү болгондой, 4 жаштан 10 жашка чейинки 6 бала айыл четинде ойноп жүрүп жардыргыч зат таап алышкан. Этиятсыздыктан улам жарылуу болуп, 5 бала ар түрдүү жаракат алышкан. Ал эми бир бала окуя болгон жерде көз жумган. Дагы бири ооруканада каза болгон.