"Ысык-Атада ишкерди өлтүрүп, денесин өрттөп салган" деп шектелип таксист кармалды

Ысык-Ата районунда адам өлтүрүү фактысынын бети ачылды. Бул тууралуу Чүй ОИИББинин басма сөз кызматы бүгүн, 18-апрелде билдирди.

Маалыматка караганда, 2013-жылдын 17-декабрында Бишкек шаарынын Ленин райондук ички иштер бөлүмүнө жаран кайрылган. Анда Таалай Карымшаков 15-декабрь күнү саат 04:00дө үйүнөн чыгып кеткен боюнча дайынсыз экендиги айтылып, бул боюнча издөө башталган.

2014-жылдын 18-мартында Ысык-Ата районунун Талды-Булак айылында адамдын жансыз денеси табылган. Бирок денени өрттөп салышкандыктан, таанууга мүмкүн болгон эмес. Бул боюнча кылмыш иши козголуп, иликтөө башталган. Анын натыйжасында 17-апрель күнү аталган кылмышка шектелип "Ош базарында" таксист болуп иштеген Нурлан Токтоноев кармалган. Анын айтымында, 15-декабрь күнү эртең менен таанышы экөө "Ош базарында" эт сатып иштеген Таалай Карымшаковду тоноп, жанындагы 200 миң сом акчасын алышкан. Андан кийин аны өлтүрүшүп, Талды-Булактагы ээн жерде жансыз денени өрттөп салышкан. Учурда кылмышка шектүүнүн экинчисин кармоо иштери жүрүүдө.