Зардалыдагы жардыруудан кийин Чек ара кызматы Баткендин жана Чоң-Алайдын тургундарына кайрылуу жасады

Мамлекеттик чек ара кызматы Баткен облусунун Зардалы айылындагы жаш балдардын өлүмүнө алып келген кырсыкка байланыштуу кайрылуу жасады. 1999-жылы согуш учурунда жардыргыч заттар калып кетиши мүмкүн.

Мындан улам Баткен облусунун жана Ош облусунун Чоң-Алай районунун тургундарынан белгисиз заттарды таап алууда күч түзүмдөрүнө, укук коргоо органдарына кайрылууну өтүнөт. Бул тууралуу бүгүн, 18-апрелде аталган мекеменин басма сөз кызматы билдирди.

Маалыматта 2001-жылдан бери Баткен аймагында чек арачылар тарабынан 10 ок атуучу курал, 15 мина, 3 гранатомёт, ФАБ-90 үлгүсүндөгү 7 авиабомба жана миңден ашуун ар кандай калибрдеги согуштук каражаттар табылганы айтылган.

Эске салсак, жарылуу 17-апрель күнү Зардалы айылындагы “Коргон” чек ара заставасында болгон. Белгилүү болгондой, 4 жаштан 10 жашка чейинки 6 бала айыл четинде ойноп жүрүп жардыргыч зат таап алган. Этиятсыздыктан улам жарылуу болуп, 5 бала ар түрдүү жаракат алган. Ал эми бир бала окуя болгон жерде көз жумган. Дагы бири ооруканада каза болгон.

Алар Баткен согушунан калган гранатаны таап, ойноп жатып жардырып алышкан. Учурда экөөнүн абалы оор.