Австралия дайынсыз жоголгон малайзиялык учакты издөө методун карап чыгышы мүмкүн

Австралия дайынсыз жоголгон малайзиялык учакты издөө методун карап чыгышы мүмкүн. Куткаруучулар суу алдында жүрүүчү Bluefin-21 аппаратын колдонуп жатышат. Бирок андан жакшы жыйынтык чыга элек. 18-апрелде Австралиянын премьер-министринин басма сөз кызматы бийликте малайзиялык Boeing 777-200 учагын издөөнү токтотууга негиз жок экенин билдирди. 

Издөө иштери Инд океанында уланып жатат. Буга чейин изделип жаткан аймактан табылган зат химиялык экспертизадан өтүп, учакка тиешеси жок экени белгилүү болгон. 

Мындан сырткары учакка тиешелүү деп болжолдонгон кара кутуча тууралуу да айтылган. Болжолдуу сигналдар табылган аймактын тереңдиги 4500 метрди түзөт. Буга чейин сигнал байкалган аймактан алыс эмес жер кытайлык кеме тарабынан издөөгө алынган. Борттогу өзгөрүүлөрдү өз алдынча сактаган тетиктин батарейкасы 1 айга жетет деп айтылган. Ал башында сигнал берип жатканы менен, бир канча убактан кийин сигналдар да берилбей калган. Ага карабастан изилдөө иштери уланып келет.

Эске салсак, 8-март күнү Малайзиянын Куала-Лумпур аба майданынан Кытайдын Пекин шаарына сапар тарткан Боинг-777-200 учагы 239 жүргүнчүсү менен дайынсыз жоголгон. Учак асманга көтөрүлгөндөн 2 саат өткөн соң байланыш үзүлгөн. Акыркы жолу экрандан анын Вьетнам жана Малайзиянын ортосундагы деңиздин үстүндө учуп бара жатканы көрүнгөн. Издөө иштерине дүйнөнүн 30га чукул мамлекети киришип, 1 айдан бери жыйынтык чыкпай келет. Малайзия бийлиги учактын жүргүнчүлөрүнүн баары көз жумганы тууралуу билдирүү жасаган. Ага карабай учак, кемелер менен издөө иштери уланууда.