Кыргызстанда биринчи жолу күч түзүмдөрүнүн ардагерлеринин курултайы өтөт

Жаңы жылдан кийин, январь айында Кыргызстанда алгачкы жолу күч түзүмдөрүнүн ардагерлеринин курултайы өтөт. Бул тууралуу уюштуруучу комитеттин төрагасы, запастагы полковник Анвар Сартаев билдирди. Анын айтымында, өкмөт 1996-жылдан бери күч түзүмдөрүнүн ардагерлеринин толук пенсияны алуу укугун бузуп жатат. Мамлекеттин ардагерлерге карызы 2009-жылдын 31-декабрына карата 450 миллион сомго жеткен. Уюштуруу комитетинен билдиришкендей, 2012-жылы 500дөн ашык күч түзүмдөрүнүн ардагерлери сотко арыз менен кайрылышкан. “Ардагерлердин социалдык абалы жакшы эмес, аларды коргой турган мамлекеттик органдар милдеттерин аткарбай келишет”,- деп белгиледи Анвар Сартаев. Курултайда укук коргоо органдарынын, аскер кызматкерлеринин социалдык-укуктук абалы жана алардын үй-бүлөлөрү боюнча суроолор коюлат.