Коомдук ишмер Ишенбай Абдуразаков каза болду

24-апрелге караган түнү коомдук ишмер жана саясат таануучу Ишенбай Абдуразаков 77 жаш курагында каза болду.

Ишенбай Абдуразаков 1937-жылы Ысык-Көл облусуна караштуу Чолпон-Ата шаарында туулган. Кыргызстандын туңгуч президентинин мамлекеттик кеңешчиси болуп иштеген. 1971-1975-жылдары СССРдин Япониядагы элчилигинде катчы, 1975-1978-жылдары Япониянын Саппоро шаарында СССРдин консулу болуп эмгектенген.

“Кыргызстан-Япония” коомунун президенти, “Келечектин долбоору” саясий изилдөө коомдук фондунун Байкоочу кеӊешинин төрагасы, КРнын Тышкы иштер министрлигинин Дипломатиялык академиясынын Көзөмөлдөө кеӊешинин төрагасы, Борбор Азиядагы Америкалык университетинин Көзөмөлдөө кеӊешинин төрагасы.

2007-жылы Кыргыз Республикасынын Данакер ордени менен сыйланган.

Маркумдун артында жубайы Майрамкан Юсупова, уулдары Авазбек, Мурат, кыздары Айнура жана Жыпар калды.