“Жаш ырчылардын ырларынын сөздөрүн сынга алып, алардын душманына айландым” дейт акын Алтынбек Исмаилов

“Кыргыз тилиндеги ырлардын маанисин сынга ала берип белгилүү жаш ырчылардын душманына айландым”,- деп айтты бүгүн, 24-апрелде кыргыз тилине арналган тегерек столдун жүрүшүндө акын Алтынбек Исмаилов.

Анын айтымында, ал радио жана телеберүүлөр аркылуу элдин оозундагы көптөгөн белгилүү ырларды сындап келет. “Ушул ишим менен жаш ырчылардын душманына айландым. Бирок мен туура кылам. Кыргыз тилинде чала сүйлөгөндөрдү ар дайым сындап, туура сүйлөөгө үйрөтүшүбүз зарыл”,- деди ал.

“Ушул чала тилдеги ырлар элге сиңип калды. Ар кыргыз атуулу буларды ырдап жүрөт. Бир гана ырчылар эмес, бир топ басылмалардын кыргыз тили да таң калтырат. Ушундай журналисттердин, ырчылардын айынан эне тилибиз Ооганстан жана Сириядай талкаланып калды”,- деп пикири менен бөлүштү Исмаилов.