Ишенбай Абдуразаковду акыркы сапарга узатуу зыйнатынан фоторепортаж

Белгилүү коомдук ишмер, саясат таануучу жана дипломат Ишенбай Абдуразаков менен коштошуу зыйнаты бүгүн, 25-апрелде Бишкекте Т.Абдумомунов атындагы Кыргыз улуттук драма театрында болуп өттү. Ага миңге чукул адам катышып, алардын ичинде өкмөт мүчөлөрү, Жогорку Кеңештин депутаттары, президенттик аппараттын жетекчилиги, коомдук ишмерлер жана студенттер да болду. Алар Ишенбай Абдуразаковдун туугандарына көңүл айтып, маркумдун адамдык жакшы сапаттарын, жасаган иштерин эскеришти. Ишенбай Абдуразаковдун сөөгү “Ала-Арча” көрүстөнүнө коюлду.

“Ар-намыс” фракциясынан лидери Феликс Кулов коомдук ишмердин  мамлекеттик деңгээлдеги атуулдардан болгонун баса белгилеп өттү. “Ал Кыргызстандын өнүгүшү үчүн көп иш аткарып берди. Анын көптөгөн максаттары да орундалбай кете берди. Коррупциялык жана бюрократиялык систем бар болгондуктан, Ишенбай Абдуразаков өлкөнүн экономикасын өнүктүрө албай калды”,- деди Кулов.

Ишенбай Абдуразаковдун студенти, активист Данияр Назаралиев “Бир жолу Ишенбай агайыбызга китеп белек кылганбыз. Ал белекти алып, “кийинки жолу силерден өзүңөр жазган китепти күтөм” деп айтканы эсимде. Тилекке каршы, биз анын өтүнүчүн аткара албай калдык” деп агайын эскерди.

Кыргыз-Орус Славян университетинин медициналык факультетинин деканы, бард Анэс Зарифьян коомдук ишмердин элесине арнап жазган ырында Абдуразаков кыргызстандыктар үчүн алмашкыс атуул экени сүрөттөлгөн. “Кичи боюна карабастан, жоокер жана акылман болгон. Аны менен кара сөз аркылуу эле эмес, ыр түрүндө жазышкандыгыма кубанам”,- дейт Зарифьян.

Коомдук ишмер 24-апрелге караган түнү 77 жаш курагында каза тапты.