Депутаттар Оштогу кургак учук менен ооруган балдардын мектебине өкмөт 4,5 миллион сом карыз экенин айтышты

Парламентте депутаттар Ош шаарындагы кургак учук менен ооруган балдардын мектебине өкмөт 4,5 миллион сом карыз экенин айтышты. Депутат Акылбек Шакиров билдиргендей, аталган акча мугалимдердин айлыгына берилмек. “2013-жылы өкмөт 4,5 миллион сом берген эмес. Бүгүнкү күндө ал мектепти жапканы жатышыптыр”,- дейт депутат. 

Саламаттыкты сактоо министри Динара Сагынбаева муну моюнга алды. “Акчаны таап беребиз. Бирок мектеп жабылат деген туура эмес, буга чейинкидей эле иштей берет”,- деди министр.

Билим берүү жана илим министри Канат Садыков да бул маселени чечүүгө убада берди.

Айта кетсек, парламентте бүгүн “Мамлекеттүүлүктү бекемдөө үчүн” көпчүлүк коалициясы өкмөттүн 2013-жыл боюнча отчётун угууда.