УЕФАнын Чемпиондор Лигасы: Бүгүн “Бавария” менен “Реал” финалдык жолдомонун ээсин аныкташат

Бүгүн, 29-апрелде Германиянын Мюнхен шаарында УЕФАнын Чемпиондор Лигасынын жарым финалынын жооптук оюнунда “Бавария” мадриддик “Реалды” кабыл алат. Бул тууралуу УЕФАнын расмий сайты билдирет.

Маалыматка ылайык, беттешке Бишкек сааты боюнча саат 00:45те старт берилет.

Кошумчалай кетсек, бул эки клубдун ортосундагы алгачкы оюн 23-апрелде орун алып, мадриддик “Реал” 1:0 эсебинде жеңишке жетишкен. Мадриддиктерге жеңиш алып келген жалгыз голду Карим Бензема киргизген.

Хосеп Гвардиола, “Бавариянын” башкы машыктыруучусу: “Мадриддик “Реалдын” каршы чабуулдары мыкты жана футболчулар көп чуркашат. Биз топту жоготкон маалда бош аянттарды жаап, коргонууга мыктап отурушубуз керек. “Реал” алгачкы оюнда алган артыкчылыкты кармап калгысы келет. Биз конокто гол киргизе алган жокпуз, демек, бул жолу көбүрөөк чабуул уюштурушубуз керек. “Баварияны” финалда футболчулар да, мен дагы, күйөрмандар дагы көргүсү келет. Бул биздин колубуздан келет”.

Карло Анчелотти, “Реалдын” башкы машыктыруучусу: “Оюнда жеңиш кыйын болорун сезип турабыз. Бизде жогорку класстагы футболчулар чогулган. Испаниянын Лигасында УЕФАнын Чемпиондор Лигасында эң көп гол киргизген “Реалдын” бул ийгилиги дагы да улануусун каалайбыз. Демек, финалга чыгышыбыз керек”.