Канатбек Бегалиев, машыктыруучу: “Бул жеңишти биз күтүп келгенбиз”

Бүгүн, 29-апрелде өткөн маалымат жыйынынын алкагында грек-рим күрөшү боюнча Кыргызстан курама командасынын башкы машыктыруучусу Канатбек Бегалиев бул жеңиш команда үчүн күтүүсүз эмес экенин билдирди.

“Курама команданын мурунку машыктыруучусу Эмил Алыкулов машыгуу системин жана башкаларды жолго коюп кеткен. Андыктан бул жеңиш биз үчүн күтүүсүз болгон жок жана биз үчүн бул чек эмес. Азия оюндары жана ири эл аралык мелдештер Олимпиаданын тепкичи болуп эсептелет”,- деди Канатбек мырза.

Андан тышкары ал каражат маселесине нааразычылыгын жашырган жок. “Иранда күрөш түрлөрүнө жылына 25 миллион доллар коротушат экен. Биз каражатты кыйынчылык менен таап, командалык эсепте Иранды артка калтырдык (Кыргызстан командалык эсепте 2-орунду ээледи). Мамлекет спортко көңүл буруп, колдоп койсо, жакшы жыйынтыктар боло бермек”,- деп кошумчалады курама команданын башкы машыктыруучусу.