Лондондук жаш жубайлар бал айында Кыргызстанга келип кетишти

Маалыматка ылайык, эки жаш 674 күндүн ичинде 3 континентти басып өтүшкөн. Велосипеддин педалын кыймылдатып жүрүп отурган алар Австралия, Малайзия, Индонезия, Таиланд, Лаос, Вьетнам, Кытай, Кыргызстан, Казакстан, Өзбекстан, Түркия сыктуу бир катар өлкөлөрдө болушкан. Көптөгөн чөлдөрдү, токойлорду аралап, сууларды кечип, ал тургай катуу жер титирөөлөрдү баштан өткөргөн алар март айында өз мекенине кайтып келишкен. Эки жашты жакын туугандары, достору, ата-энеси кучак жайып тосуп алышкан. Стивдин атасы "Мен булар кетип жатканда "эки жума жүрсөңөр да чогуу кайтып келгиле" деген кеңеш берген элем. Минтип балдарым аман-эсен кайтып келишти" деп кубанычын жашырбаган. 

Бир канча өлкөлөрдө болгон эки жаш Кыргызстандан өзгөчө таасир алышканын жашырышкан эмес. "Кыргызстан деген өлкө бар экенин уккан эмес экенбиз. Жадакалса башында анын атын айтууга тилибиз келбей жаткан. Бийик-бийик тоолору, жаратылышы кооз өлкө экен. Боз үйдүн тигилишине өз көзүбүз менен күбө болдук. Ал гана эмес, асмандагы жылдыздарды карап анда түнөп да көрдүк. Мемиреген тынчтык...

Калкы абдан меймандос, боорукер келишет экен. Жолдо жүргөнүбүздө унаа менен бараткандар шоколад, суусундуктарды берип өтүп жатышты. Айрымдар үйүнө конокко чакырып, өзгөчө даамдуу тамактарды жасап беришти",- деп жакындарына биздин өлкө тууралуу айтып беришкен.