Аргентиналык Лионель Месси 4-ирет "Дүйнөнүн мыкты футболчусу" аталды

Мындан бир саат мурда Швейцариянын Цюрих шаарында Футбол ассоциацияларынын эл аралык уюму 2012-жылдын жыйынтыгын чыгарды. Футбол жаатында жылдын мыктыларына сыйлык тапшырууга арналган салтанат чакан концерттик программа менен коштолуп, анда алпаруучулук милдетти голландиялык экс-футболчу Рууд Гуллит менен телеалпаруучу Кай Мюррэй аркалашты. Кечеде абройлуу делген “Жылдын мыкты футболчусу” наамы аргентиналык Лионель Мессиге буюруп, ага кезектеги "Алтын топ" тапшырылды. Месси аталган сыйлыкка катары менен 4-ирет ээ болуп, рекорд койду. “Жылдын мыкты машыктыруучусу” деп испаниялык Висенте дель Боске табылса, “Мыкты гол” номинациясында словакиялык Мирослав Стох жеңүүчү аталды. 

Сүрөттөргө комментарий: 

1. ФИФАнын версиясы боюнча 2012-жылдын "Кыялдагы командасы": Икер Касильяс (дарбазачы, "Реал"), Данни Алвеш (коргоочу, "Барселона"), Серхио Рамос (коргоочу, "Реал"), Херард Пике (коргоочу, "Барселона"), Марсело (коргоочу, "Реал"), Хаби Алонсо (жарым коргоочу, "Реал"), Хави (жарым коргоочу, "Барселона"), Андрес Иньеста (жарым коргоочу, "Барселона"), Криштиану Роналду (чабуулчу, "Реал"), Лионель Месси (чабуулчу, "Барселона") жана Радамель Фалькао (чабуулчу, "Атлетико").

2. Пиа Сундхаге (кыз-келиндер арасында АКШнын улуттук курама командасынын башкы машыктыруучусу) - кыз-келиндер футболунда 2012-жылдын мыкты машыктыруучусу.

3. Висенте Дель Боске (Испания курама командасынын башкы машыктыруучусу) - 2012-жылдын мыкты машыктыруучусу.

4. "Таза оюн" сыйлыгы Өзбекстандын футбол федерациясына буюрду. 

5. Германиялык Франц Беккенбауэр футболдун өнүгүшүнө кошкон салымы үчүн ФИФАнын президентинин атайын сыйлыгына татыды.

6. Эбби Вамбах (АКШ) - 2012-жылдын мыкты футболчу айымы.

7. Лионель Месси (Аргентина) - 2012-жылдын мыкты футболчусу.