Бишкекте "унаалардын терезелерин сындырып, баалуу буюмдарды уурдап" жүргөн деп шектелип эки жаран кармалды

Борбор калаанын 2 тургуну "жол тандабас унаалардан баалуу буюмдарды уурдап жүрүшкөн" деп шектелишүүдө. Бул тууралуу Бишкек ШИИББинин басма сөз кызматы бүгүн, 30-апрелде билдирди.

Белгисиз адамдар Бишкек шаарынын Зияш аттуу тургунуна таандык Тойота-Секвойя жол тандабас унаасынын айнегин талкалап, 20 миң сомго бааланган буюмдарын уурдап кетишкен. Ошондой эле Алтынай аттуу жарандын да Лексус RX-350 жол тандабас унаасынын айнегин сындырып белгисиз адамдар “Айфон-4” үлгүсүндөгү уюлдук телефонун уурдап кетишкен. Аталган кылмыштарга шектүү катары 25 жаштагы Адилет жана 21 жаштагы Айкөл аттуу жарандар кармалган. Учурда иликтөө иштери уланууда.