Кара-Суу районунда атышуу болуп, бир жаран жараат алды. Ал Мелис Мырзакматовдун жакын тууганы экендиги айтылууда

Бүгүн, 30-апрель күнү саат 15:25те Кара-Суу районуна караштуу Дыйкан-Кыштак айылында атышуу болуп, андан Жеңишбек Сайдиев аттуу жаран жараат алды. Бул тууралуу Ош ОИИБинин басма сөз кызматы билдирди. 

Маалыматка ылайык, Дыйкан-Кыштак айылынын Б.Осмонов көчөсүндө жашаган 1977-жылы туулган Сайдиев Жеңишбектин үйүнө белгисиз бирөө кирип, короодо турган үй ээсин кош ооз мылтык менен эки жолу аткан. Андан соң мылтыкты окуя болгон жерге калтырып, өзү кара-көгүлтүр түстөгү Мерседес-Бенц үлгүсүндөгү автоунаага отуруп, изин жашырып кеткен. Жабырлануучу Ж.Сайдиев оң колунан, көкүрөгүнөн жана арткы капталынан жараат алып, үй-бүлө мүчөлөрү тарабынан Ош шаардык ооруканасына жеткирилген. Окуя болгон жерди кароо учурунда 16-калибрдеги Иж-58м үлгүсүндөгү кош ооз ок атуучу мылтык, 2 даана 16-калибрдеги мылтыктын атылган октору далил катары алынган. Бул окуя боюнча топтолгон материалдар Кара-Суу РИИБине өткөрүлүп, КРнын Кылмыш-жаза кодексинин 28-97-беренесине ылайык кылмыш иши козголду. Учурда тергөө амалдары жүрүүдө.

Кылмыштын бетин ачуу максатында тез арада шаардын жана облустун аймагында ‘‘Торомо” тосуу-издөө калыптык иш-чарасы киргизилип, окуя болгон жерде ыкчам-иликтөө иш-чаралары өткөрүлүүдө. "Анын өмүрүнө кол салуу жеке ишмердүүлүгү менен байланышкан" деген божомол боюнча иш алып барылууда.