Индонезиянын 6 жаштагы тургуну 4 жылдан соң тамекисин таштады. Бирок эми ал сугалактыгынан жапа чегүүдө

Былтыр интернет айдыңында Индонезиянын 6 жаштагы Алди Ризал аттуу тургуну 4 жылдан бери күнүнө 40 даанадан тамеки тартып келгендиги тууралуу маалымат тараган эле. Анын күнүмдүк чылымына 8 доллар кетчү. Учурда ал дарыгерлердин жардамы менен бул адатынан арыла алды. Бирок эми ага дагы бир жаман адат жабышты. Алди тамак-ашка тойгонун билбей, колуна эмне тийсе ошонун баарын жеген адат тапкан. Бул тууралуу жакында чет элдик маалымат каражаттары жазып чыгышты.

Маалыматка ылайык, Алди Ризал 2 жашында дүйнөдөгү эң кичинекей тамеки тарткан адам катары таанылып, гезиттин мукабасына чыккан. Ушундан кийин Индонезиянын бийлиги ага көңүл буруп, атайын дарылоодон өткөрүшкөн. 

"Уулум 2 жашынан тарта тамеки тартат. Бул адатын койдуруу үчүн канча аракет кылдык. Бербей койсок жини келип, чыргоолонуп, башы менен дубалды сүзгүлөй баштайт. Ушундан улам тамеки сатып берүүгө аргасыз болчубуз. Азыр бирөөлөр тамеки сунса, "дарыгеримди жакшы көрөм, аны капа кылгым келбейт" деп колуна албайт. Эми бизди уулумдун тойгонун билбей көп тамак жеп жатканы сарсанаа кылууда. Күнүгө толтура тез даярдалуучу тамактарды жеп, эки банка коюулатылган сүт ичет. Учурда Алдинин салмагы 26 килограмм, нормалдуу салмагынан 5 килограммга ашык. Диетологдорго кайрылсак, күнүмдүк рационуна жашылча-жемиштерди көп кошуңуздар деп кеңеш беришти",- дейт Алдинин энеси Диана баласынын ден соолугуна тынчсызданып.