Улуу Ата Мекендик согушта курман болгондорду эскерүү митинг-реквиеминде 3 мектеп окуучусу эсин жоготту

Улуу Ата Мекендик согушта курман болгондорду эскерүүгө келген ардагерлерди жана катышуучуларды мектеп окуучулары тосуп алып жатышкан. Митинг-реквием саат 10:00дө башталмак. Окуучулар жарым саат эрте келишкени маалым болду.

“Айта кетчү нерсе, Улуу Ата Мекендик согушта курман болгондорду эскерүү иш-чараларына катышкан окуучулар эсин көп жоготушат. Себеби мындай жолугушууларда каза тапкандар жөнүндө, согуш тууралуу көп айтылат. Ал эми азыркы жаштар өтө сезимтал келишет. Кыздардын да, балдардын да эсин жоготуп кулап калган учурлары болгон. Ал эми “Боордоштор көрүстөнүндө” өткөн иш-чараларда мектеп окуучулары эсин жоготкон мындай көрүнүш да биринчи жолу эмес. Анткени бул жердин энергетикасы өзгөчө келет. Былтыр да эки-үч окуучу эсин жоготкон болчу”,- деди Биринчи Май районунун акими Аскар Алиев.

Ал эми мектептин окутуучуларынын айтымына караганда, эртең менен окуучуларга чай жана таттуу токоч берилген. Бул иш-чарага катышкан окуучулардын баары буга чейин медициналык кароодон өтүп, дени сак болуп чыккан.  

"Тез жардам" кызматынын өкүлдөрү окуучулар курсагы ачка болуп, күндө турганы үчүн эсин жоготушканын айтышты.  

Эске салсак, бүгүн “Боордоштор көрүстөнүндө” Улуу Ата Мекендик согушта курман болгондордун жаркын элесине арналган митинг-реквиемге №15-орто мектептин окуучулары да катышкан. Аталган көрүстөндө согушта каза тапкан 248 жоокердин сөөгү коюлган.