Ош мамлекеттик университетинде спорт аянтчасы ачылды

6-майда Ош мамлекеттик университетинде волейбол, баскетбол боюнча спорт аянтчасынын ачылуу аземи болуп өттү. Бул тууралуу бүгүн, 7-майда окуу жайдын басма сөз кызматы билдирди.

Ага университеттин профессордук-окутуучулук курамы жана студенттери катышышты. Маалым болгондой, спорт аянтчасы ОшМУнун Түштүк-Чыгыш кичи шаарчасында жайгашып, анда волейбол, баскетбол аянтчасы менен биргеликте спорт оюндарын көрүүгө ылайыкташкан орундуктар да жайгаштырылган.

Салтанаттуу аземде сөз сүйлөгөн ректор Каныбек Исаков: «Жаштар жүргөн жерде ден соолук, спорт, кыймыл болушу керек. Спортко көңүл буруу менен окутуучуларыбызды, студенттерибизди сергек жашоого үндөп жатабыз»,- деди.

Айта кетсек, аянтчанын ачылуу аземинен кийин окутуучулардын, студенттердин курама командаларынын катышуусундагы волейбол оюну боюнча чемпиондук башталды. Мелдеш ОшМУнун профессордук-окутуучулук курамынын, кызматкерлеринин жана студенттердин ден соолугун чыңдоо, аларды сергек жашоо образына калыптандыруу максатында уюштурулуп, жалпысынан 50 миң сом байге фонду коюлган. Оюн эки күнгө созулат.