Японияда "Кимдин баласы катуу ыйлайт?" мелдеши болуп өттү

Апрель айынын аягында Токио шаарындагы Сеноджи чиркөөсүндө "Накидзумо", тагыраак айтканда, "Кимдин баласы катуу ыйлайт?" фестиваль-мелдеши болуп өткөн. Ага 6 айлык наристеден 3 жашка чейинки 120 бала катышкан. Бул тууралуу бүгүн, 7-майда чет өлкөлүк маалымат каражаттары кабарлашты.

Маалымдалгандай, сынактын шарты боюнча, жаш сумочулар балдарды колуна алып, аларды ыйлатуусу керек. Эгер бала ыйлабаса, аларды коркутууга чейин барышат. Кайсы бала катуу ыйласа, ошол жеңүүчү деп табылат. 

Белгилей кетсек, япон эли "Бул сынак баланын психикасына терс таасирин тийгизбейт. Тескерисинче, ыйлаганда өпкөсү ачылып, моюн жана төш булчуңдары бекемделет" деп эсептешет. Европалыктардан айырмаланып, алар баласы ыйласа чуркап барып сооротууга шашышпайт экен. "Үнү катуу чыккан баланын ден соолугу чың болот, ошондой эле бала чаңырып ыйлаганда үйдөгү терс күчтөр сыртка качып чыгышат" деп эсептеп, жыл сайын бул сынакты уюштуруп келишет.