Бишкекте “шаар тургунун коркутушуп, кымбат баалуу уюлдук телефонун, акчасын тартып алышкан” деп айыпталып 3 айым кармалды

Бишкек шаарында милиция кызматкерлери тарабынан 3 айым кармалды. Алар “шаар тургунун коркутушуп, кымбат баалуу уюлдук телефонун, акчасын тартып алышкан” деп айыпталып жатышат. Бул тууралуу Бишкек ШИИББинин басма сөз кызматы бүгүн, 8-майда билдирди.

Маалыматка караганда, күч органдарына 43 жаштагы Элвира аттуу айым кайрылган. Анда ал Киев жана К.Акиев көчөлөрүнүн кесилишинен белгисиз аялдар күч колдонуп уюлдук телефонун, акчасын тартып алышканын айткан. Бул боюнча ыкчам аракеттер жүрүп, аталган кылмышка шектүү катары Бишкек шаарынын тургундары 52 жаштагы Гүлнур, 25 жаштагы Наргиза, 31 жаштагы Жылдыз кармалды. Учурда тергөө амалдары жүрүп жатат.