Өзгөн районунда кытай жарандары менен жергиликтүү тургундардын ортосунда массалык мушташ болду

Ош облусунун Өзгөн районундагы Куршаб айылында жергиликтүү тургундар менен кытайлык мигранттардын ортосунда чыр чыкканын Ош облустук ИИББ билдирди. Маалыматка ылайык, 8-январь күнү саат 19:30 чамасында Куршаб айылындагы “Астан-Ата” кафесинин жанынан өтүп бара жаткан Мураталы Сасыковду кытайлык "ТВЕА" компаниясынын 4 өкүлү телефон уурдады деген шек менен катуу сабап, аталган кафенин ичине камап салышкан. Башка дагы эки кытай жараны ошол эле айылдын тургуну Шайыргүл Жумабаеваны токмоктоп, аны да Сасыковдун жанына камашкан. Жабырлануучу Мураталы Сасыков атасына телефон чалууга үлгүрүп, окуя болгон жерге жетип келген атасын да кытай жарандары ур-токмокко алышкан. Окуя болгон жерге айылдын 100дөй тургуну чогулуп, натыйжада кытайлар менен жергиликтүү элдин ортосунда кагылышуу чыгып, 18 кытай жараны денесинен ар кандай жараат алышканы айтылууда. Барымтадагы эки кыргызстандык ооруканага жаткырылып, учурда бул иш боюнча кылмыш иши козголуп, иликтөө иштери жүргүзүлүүдө.