Бишкекте биринчи жолу кыз-келиндер арасында волейбол боюнча эл аралык чемпиондук өтөт

Бишкектеги Кожомкул атындагы Спорт Сарайында 23-27-январь күндөрү биринчи жолу волейбол боюнча аялдар арасында чемпиондук өтөт. Бул тууралуу КРнын Волейбол федерациясынын башкы катчысы Кылычбек Сарбагышев билдирди. Анын айтымында, аталган чемпиондукта өлкөнүн аймактарынан келген “Алай-Датка”, “Улар”, “КРСУ” жана “Салам-Алик” кыз-келиндер командалары күч сынашат. Ошондой эле мелдешке Орусиянын Ханты-Мансийский автономдук облусунан келген курама команда жана Казакстандын “Жаштык”, “Спартак-АНТ” командалары да катышмакчы. "Негизги максат - Кыргызстандын спортчуларын Орто Азия чемпиондуктарына алып чыгуу. Бул таймашта жеңүүчү болгон команда апрель айында өтүүчү Түрк дүйнө эл аралык мелдешине жолдомо алат",- деди Сарбагышев.