Бүгүн Ошто эстакадалык көпүрөнү куруу боюнча тендер өтөт

Бүгүн, 19-майда эстакадалык көпүрөнүн курулушу боюнча тендер өткөрүлөт. Бул тууралуу вице-мэр Жапар Ормонов билдирди.

Анын айтымында, буга чейин өткөрүлгөн тендерде бир катар мыйзам бузуулар катталгандыгын айтып шаардык прокуратура мэрияга кат жолдогон.

"Буга чейин өткөрүлгөн тендерлер Ош шаардык прокуратурасы тарабынан мыйзамсыз деп табылып, жокко чыгарылган. Ал эми көпүрөнү куруу үчүн Ош шаардык кеңешинин өткөн жыйындарында ар кандай формадагы төрт долбоор сунушталган. Бүгүнкү күндө тендерге катышуу үчүн 6га жакын жеке ишкана арыз берген. Бирок саат 16:00гө чейин арыздарды кабыл алуу уланат. Так маалымат ошондо чыгат",- деди ал.