“Бийликтегилер бизге жолукпаса, Ак үйдүн алдына боз үй тигип, эч жакка кетпейбиз” дейт Жумгалдагы элдик сот боюнча акциянын катышуучусу

Жумгалдагы элдик сот боюнча СИЗОдо отургандардын биринин аялы Дамира Садырбаева

Пикеттин катышуучулары

Бүгүн, 20-майда Ак үйдүн жанында Жумгалдагы "Кара-Кече" кенинде каза болгон Айбек Мамбеталиевдин 20 чакты тууганы жана жердештери нааразылык акциясына чыгышты. Иш-чаранын катышуучусу, Жумгалдагы элдик сот боюнча СИЗОдо отурган жарандардын биринин аялы Дамира Садырбаеванын айтымында, алардын талаптары төмөнкүдөй:

- 2014-жылдын 20-февралында Жумгал райондук сотунда болгон жаңжал боюнча тергөө амалдарын Нарын ОИИБи эмес, УКМК же Башкы прокуратура жүргүзсүн;

- Ошол сот боюнча күнөөсүз кармалгандар бошотулсун;

- КРнын ИИМинин системинде болгон коррупцияны, кландашууну жана трайбализмди жок кылуу.

“Эгер бийликтегилер бизге чыгып жолукпаса, талаптарыбызга көңүл бурбаса, Ак үйдүн жанына боз үй тигип, эч жакка кетпейбиз”,- деди Садырбаева.

Эске салсак, Кара-Кечеде каза болгон Айбек Мамбеталиевдин жакындары 20-февралда болгон сот отурумунда жаңжал чыгарышкан. Анда айыпталып жаткан 3 милиция кызматкерин көздөй күйүүчү май куюлган бөтөлкөлөр ыргытылып, залда өрт чыккан. Натыйжада бир милиция кызматкери катуу сабалып, күйүк алган. Экинчисин милиция кызматкерлери аман алып калышкан. Үчүнчүсү Рустам Токтогулов тууралуу "ал Көкөмерен дарыясына ыргытылган" деген болжолдуу маалыматтар жарыяланган.

Ал эми 21-февралда Жумгалдагы элдик сот боюнча “адам өмүрүнө кол салуу”, “сот адилеттигин жүзөгө ашырууга тоскоолдук кылуу”, “бийлик өкүлүнө карата зомбулук көрсөтүү”, “мүлктү атайылап жок кылуу же зыянга учуратуу” беренелеринин негизинде кылмыш иши козголгон.