Ош шаарында өткөрүлгөн футболдук мелдешти Бишкектин шоу чөйрөсүнүн өкүлдөрү жеңип алышты

20-майда Ош шаарынын борбордук стадионунда шоу чөйрөнүн өкүлдөрүнүн ортосунда футбол боюнча таймаш өткөрүлгөн. Ага Бишкек жана Ош шаарындагы чыгармачыл жигиттерден куралган 2 команда катышкан.

Жыйынтыгында бишкектик “Бишкек футболдук клубу” командасы 5:4 эсеби менен жеңишти өңөрүп кайтты. Бул тууралуу таймашка катышкан ырчы Ислам Акматов бүгүн, 21-майда SUPER.kg порталына билдирди.

“Бишкек футболдук клубу” командасын ырчылар Ислам Акматов, Урмат Усенов, Омар, Арсен, Бегиш, Заир Токторов, “Wi`ll be” тобунун үч бийчиси, “Тамашоу” долбоорунун негиздөөчүсү Эрмек Нурбаев түзүшкөн.

Ал эми “Ош” командасы куудул Жеңишбек Айтиев, "Тамашоу" долбоорунун "Nо name" командасынын мырзалары жана башкалардан куралган.

Ислам Акматов, ырчы таймаш тууралуу оюн төмөнкүчө билдирди: “Стадионго чыкканда элдин көптүгүн көрүп абдан сүйүндүк. Көрүүчүлөр жакшы кабыл алышты. Таймашка бир ай мыкты даярданып барганбыз. Алар да жакшы даярдык көрүшүптүр, күчтүү команда экен. 2 таймда тең 0:0 болгон, бирок пенальтиде 5:4 эсебинде жеңиш биз тарапка ооду. Таймаштын максаты жаштарды спортко үндөө жана ырчылардын ынтымагын бекемдөө болуп саналат”.