Улуу Британияда эргулдар кебетеси Гитлерге окшош болгондугу үчүн мышыкты сабап кыйнашты

Улуу Британиядагы Тредворт шаарында эргулдар кебетеси Гитлерге окшош болгондугу үчүн мышыкты сабап, таштанды салынуучу челекке ыргытып кетишти. Бул тууралуу бүгүн, 23-майда чет элдик маалымат каражаттары жазып чыгышты. 

Маалыматка ылайык, Баз аттуу ала мышыкты жергиликтүү калк тумшугундагы кара түгүнө карап Китлер деп аташчу. Бул мышыктын ээси Кристи Спэрроу "Баз кебетеси үчүн садисттердин ур-токмогуна, шылдыңына кабылып, көзүнөн айрылып калды. Ал Гитлерге окшош болгону үчүн күнөөлүү эмес. Жакшынакай, сүйкүмдүү, тартынчаак жаныбар",- дейт. 

Мышыктын кожойкесинин айтымында, ал дем алыш күнү сейилдегени сыртка чыгып, кайра кайтпай калган. Сарсанаа болгон Кристи интернет аркылуу ага издөө жарыялаган. Эртеси күнү эле кошунасы Баз таштанды салынган челек жакта жүргөнүн айтат. Көп өтпөй Баз үйгө өзү кирип келген. 

Жыйынтыгында Кристи мышыгынын көзүнө 50 миң сомдон ашык каражатка операция жасаткан. Учурда полиция кызматкерлери мындай мыкаачылыкка кимдер барганын аныкташууда.