“Өзүм өзүмдү өлтүрөм” деп коркуткан кыргызстандык Орусиядан мекенине алынып келинди

2014-жылдын 23-майында Орусиянын Миграция кызматынын кызматкерлери өздүгүн аныктаган документи жок кыргызстандыкты кармап, анын федералдык издөөдө жүргөнүн аныкташты. Бул тууралуу кечээ, 26-майда Орусиянын Челябинск облусунун Сот аткаруучулар кызматынын федералдык башкармалыгынын басма сөз кызматы жарыялады.

Маалым болгондой, ал өз мекенин аймагында болгон кылмыштар (уюмдашкан топ тарабынан жасалган алдамчылык; жасалма документтерди, мамлекеттик сыйлыктарды, штамптарды, мөөрлөрдү, бланктарды даярдоо, сатуу жана колдонуу) боюнча шектелген.

Орусиянын сотунун токтомуна ылайык, ал Кыргызстанга жөнөтүлүүгө милдеттендирилген. Бирок соттун чечимин уккан соң ал “өзүмдү өзүм өлтүрөм” деп коркута баштаган. Мындан кийин сот аткаруучулар аны катуу көзөмөлдөөгө алышып, Челябинск – Ош учагы менен мекенине жеткиришкен. Кыргызстанда болсо аны жергиликтүү укук коргоочулар тосуп алышып, СИЗОго алып барышты.