Бишкек шаардык соту Дмитрий Цойго карата чыккан биринчи инстанциядагы соттун чечимин күчүндө калтырды

Бишкек шаардык соту Дмитрий Цойго карата чыккан биринчи инстанциядагы соттун чечимин күчүндө калтырды. Бул тууралуу бүгүн, 28-майда Жогорку Соттун басма сөз кызматы билдирди.

Маалыматка караганда, 26-майда Бишкек шаардык сотунун жазык иштери жана административдик укук бузуулар жөнүндөгү иштер боюнча соттук коллегиясы Бишкек шаарынын Биринчи Май райондук сотунун 8-майдагы чечимин күчүндө калтырды. Биринчи Май райондук соту “Интел-Линкс” жоопкерчилиги чектелген коомунун экс-директору Дмитрий Цойго карата баш коргоо чарасын карап, 2014-жылдын 6-июлуна чейин абакта болуу чечимин кабыл алган.

Айта кетсек, “паспорт падышасы” атыккан Дмитрий Цой 2014-жылдын 6-май күнү адам өмүрүнө кол салуу фактысына шектелип кармалган. Учурда Бишкектеги №1-СИЗОдо отурат.