Американын Бостон шаарындагы жардыруу боюнча дагы бир кыргызстандыкка айып тагылууда

Кыргызстандык 23 жаштагы Хайрулложон Матанов “АКШнын Бостон шаарындагы жардырууга тиешеси бар” деп айыпталып жатат. Бул тууралуу чет өлкөлүк басылмалар жазып чыгышты.

Маалым болгондой, америкалык тергөөчүлөр Х.Матановду далилдерди жок кылуу жана жалган маалымат берүү боюнча күнөөлөп жатышат. “Ал террордук чабуулга негизги айыпталуучулар Жохар жана Тамерлан Царнаевдер менен достук мамиледе болгон. Бирок суракта муну танган”,- деп айтылат чет өлкөлүк басылмалардын маалыматында. Мындан тышкары Х.Матанов АКШнын Массачусетс штатынын Квинси шаарында иштегени белгилүү болду.

Эскерте кетсек, "2013-жылдын 15-апрелинде Бостон шаарында өткөн марафон учурунда эки жардырууну жасаган" деп шектелип Жохар Царнаев 19-апрелде кармалган. Ал эми анын агасы Тамерлан Царнаев 18-апрелде аталган окуядан соң полиция кызматкерлери менен атышуу учурунда окко учкандыгы айтылган. Жарылуунун натыйжасында 4 адам каза болуп, 183ү жаракат алган.