Алайда жол тоскондор боюнча 3 кылмыш иши козголду

Алайда жол тоскондор боюнча 3 кылмыш иши козголду. Бул тууралуу ИИМдин Ош облусу жана Ош шаары боюнча башкармалыгы бүгүн, 2-июнда билдирди.

Маалыматка караганда, кылмыш иштери “өзүм билемдик”, “зөөкүрлүк” жана “бийлик өкүлүнө каршы зомбулук көрсөтүү” беренелери боюнча козголду. Айта кетсек, 31-май күнү саат 16:00 чамасында Ош облусунун милиция кызматкерлери Алай районундагы жол тоскондорго түшүндүрүү иштерин жүргүзүү максатында барышкан. Бирок ал жердеги уюштуруучулардын бири Керим Сарбашев “чыгып кетсин, болбосо ур-токмокко алабыз” деп балдарды үгүттөп, Анатолий Жээнбаевди ур-токмокко алдырган. Учурда Жээнбаев ооруканада. 

Айта кетсек, 27-майда Алайда Ахматбек Келдибековдун тарапташтары митингге чыгышкан. Алар Келдибековду абактан чыгаруу талабын коюшуп, Сопу-Коргон айылында Ош - Эркеч-Там унаа жолун тосуп алышкан.