“Кыз зордуктоого аракет кылды” деп айыпталып жаткан “Манас” авиациялык базасынын кызматкери 4 жылга эркинен ажыратылды

Свердлов райондук соту “кыз зордуктоого аракет кылды” деп айыпталып жаткан “Манас” авиациялык базасынын кызматкерин 4 жылга эркинен ажыратты. Бул тууралуу Свердлов райондук сотунан бүгүн, 2-июнда кабарлашты.

Эске салсак, 8-март күнү Кыргызстандагы АКШнын “Манас” авиациялык базасынын кызматкери Макрэй Брендэн Корнелиус мас абалында Б.Жамыйла аттуу бийкечти зордуктоого аракет кылып, камакка алынган.

Маалым болгондой, америкалык жаран Шопоков-Москва көчөлөрүнүн кесилишинде аталган айымга тийишип, зордуктоого аракет кылган. Андан соң ал жыныстык кызмат үчүн селкиге акча каражатын сунуштаган. Б.Жамыйла макул болбой, такси кармап, качууга аракет кылганда Брендэн Корнелиус ошол таксиге отура калган. Бийкеч айдоочудан милицияга алып барууну суранган. Такси кызматынын айдоочусу аларды Свердлов РИИБинин №10-шаардык милиция бөлүмүнө алып келип, милиционерлерди чакырган. Ошол учурда америкалык жаран эки милиция кызматкери менен мушташа кетип, погондорун жулуп салган.

АКШнын жараны Брендэн Корнелиус суракка алынганда, ал 2014-жылдын 8-мартында “Бруклин” кафесинде эс алып, мас болуп калганын айтып берген. Мындан тышкары ал 1985-жылкы экени белгилүү болгон.

Свердлов райондук соту тарабынан аталган америкалык жаран “бейбаштык” беренеси боюнча күнөөлүү деп табылып, күчөтүлгөн режимдеги түзөтүү мекемесине 4 жылга эркинен ажыратуу боюнча чечим чыгарды.