Американын “Манас” аэропортунда орун алган Жүк ташуу борбору эртең расмий түрдө жабылат

Борбор калаада эртең, 3-июнда “Манас” аба майданындагы Американын Жүк ташуу борборунун расмий жабылышы өтүп, Америка тарап кыргыз өкмөтүнө символикалуу түрдө базанын ачкычын тапшырат. Бул тууралуу бүгүн, 2-июнда басма сөз жыйынында Жүк ташуу борборунун командачысы Жон Миллард билдирди. Маалыматка ылайык, борбордо учурда 400гө жакын аскер бар. Алардын баары келишимде көрсөтүлгөн мөөнөттө чыгып кетет. Келишимге ылайык, алар июль айына чейин чыгарылып кетиши керек. Жүк ташуучу борбор менен бирге кыргыз тарапка борбордогу 30 миллион долларлык техника кошо тапшырылмакчы. Борбордун бир бөлүгү Румыниядагы базага көчүрүлдү. Калганы Америка Кошмо Штаттарына ташылат.