Орусияда 3 күндүк издөөдөн кийин көлмөгө чөгүп кеткен кыргызстандыктардын сөөгү табылды

Орусияда 3 күндүк издөөдөн кийин көлмөгө чөгүп кеткен кыргызстандыктардын сөөгү табылды. Бул тууралуу 2-июнда КРнын Орусиядагы элчилигинин басма сөз кызматы билдирди.

Маалым болгондой, элчиликке Т.Р. аттуу Кыргызстандын жараны кайрылып, Чертанов көлмөсүнө 1984-жылы туулган А.Б. менен 1984-жылы туулган Ш.Т. чөгүп кеткенин айткан. Белгилүү болгондой, алар аталган көлмөнүн жээгинде спирт ичимдиктерин ичип отурушуп, түнкү саат 03:00 чамасында А.Р. көлмөнү сүзүп өтүү үчүн сууга секирген. Бирок сууга түшкөндө эле чөгө баштаган. Аны издөө үчүн артынан Ш.Т. секирип, ал дагы суу алдына кирип кеткен.

Соттук-медициналык экспертиза "көлмө терең болбогондуктан, алар сууга секиргенде омурткасын же мойнун сындырып алышы мүмкүн" деген тыянак чыгарышкан. Орусиядагы Кыргызстандын элчилиги Москвадагы ӨКМ менен биргеликте издөө иштерин жүргүзүшкөн. 3 күндөн кийин алардын сөөгү табылган.

Мындан улам элчилик Кыргызстандын жарандарына эс алуу учурунда, мас абалында болгон кезде бейтааныш жерлерде же агымы күчтүү болгон сууларга түшпөөгө чакырат.