Бишкекте "бет кап кийип жарандарды күч колдонуп тоноп жүргөн" деген шек менен 7 жаран кармалды

"Бишкекте бет кап кийип жарандарды күч колдонуп тоноп жүргөн" деген шек менен 7 жаран кармалды. Бул тууралуу Бишкек ШИИББинин басма сөз кызматы бүгүн, 2-июнда билдирди.

Ушул жылдын 19-майында Бишкектеги Купянская көчөсүндө жайгашкан үйгө бет кап кийген куралчан белгисиз адамдар кирип келишкен. Алар үйдүн ээсин жана жубайын байлап, жашы жете элек кызын өзүнчө бөлмөгө камап салышкан. Кийин үй ээсин тапанча жана бычак менен коркутуп, уюлдук телефондорун жана 5000 доллар акчасын алып кетишкен.

Ыкчам аракеттердин натыйжасында аталган кылмышка шектүү катары Чүй облусунун 23 жаштагы Мирлан, 22 жаштагы Жалал-Абад облусунун Нурлан, 31 жаштагы Нурмат, Талас облусунун 22 жаштагы Урмат, Нарын облусунун 23 жаштагы Белек, 20 жаштагы Эламан, Ош облусунун Эрлан аттуу жарандары кармалган. Учурда алар №1-СИЗОго камакка алынып, иликтөө иштери жүрүп жатат.