Алыш күрөшү боюнча өткөн Азия чемпиондугунда Кыргызстан 17 мамлекеттин ичинен 3-орунду ээледи

Иранда жыйынтыкталган алыш күрөшү боюнча Азия чемпиондугунда командалык эсепте Кыргызстан 17 мамлекеттин ичинен 3-орунду ээледи. Мекендештерибиз 1 коло, 5 күмүш жана 1 алтын медаль утушкан. Бул тууралуу бүгүн, 3-майда курама команданын башкы машыктыруучусу Кабыл Бөрүбаев билдирди.

Анын айтымында, 1-орунду Түркмөнстандын спортчулары ээлешсе, 2-орун мелдешке 4 команда катыштырган үй ээси Иранга тийди. 

Кошумчалай кетсек, Кыргызстандын эсебиндеги алтынды абсолюттук салмак категориясында (100 килограммдан жогору) Нурбек Аканов багындырды. Канимет Барпыбеков 100 килограмм салмакта коло тагынса, Мырзабек Кочкоров (70 кг), Руслан Табалдиев (80 кг) жана Сабыржан уулу Акматжан (100 килограммдан жогорку салмак) күмүш тагынышты. Кыз-келиндер арасында болсо Эльза Абдыкадырова (52 кг) менен Бүбүсайра Абдыманап кызы (66 кг) финалда жеңилип, күмүш тагынышкан.