Жаңы зеландиялык окумуштуу "жоголгон малайзиялык Боинг учагын Кыргызстандын Беш-Таш өрөөнүнөн издеш керек” дейт

“Жоголгон малайзиялык Боинг-777 учагын Кыргызстандын Беш-Таш (Талас) өрөөнүнөн издеш керек” деп сунуштады Жаңы Зеландиянын окумуштуусу Дункан Стил. Бул тууралуу чет өлкөлүк басылмалар жазып чыгышты.

Анын айтымында, учак жоголгон күнү аталган аймакта түтүн байкалган. “Чындыгында, Боинг ошол жерден кулап кетиши мүмкүн, бирок бул божомол гана. Ушул версияны да караштырып койсок туура”,- деди окумуштуу.

Белгилей кетсек, окумуштуу Дункан Стил Улуу Британиянын Букингем университетинин чакырылган профессору.

Эске салсак, 8-март күнү Малайзиянын Куала-Лумпур аба майданынан Кытайдын Пекин шаарына сапар тарткан Боинг-777-200 учагы 239 жүргүнчүсү менен дайынсыз жоголгон. Учак асманга көтөрүлгөндөн 2 саат өткөн соң байланыш үзүлгөн. Акыркы жолу экрандан анын Вьетнам жана Малайзиянын ортосундагы деңиздин үстүндө учуп бара жатканы көрүнгөн. Издөө иштерине дүйнөнүн 30га чукул мамлекети киришип, 3 айга жакын убакыттан бери жыйынтык чыкпай келет. Малайзия бийлиги учактын жүргүнчүлөрүнүн баары көз жумганы тууралуу билдирүү жасаган. Ага карабай учак, кемелер менен издөө иштери уланууда.