Биринчи Май райондук ички иштер башкармалыгынын мурдагы аймактык инспектору 10 миң сом акча каражатын алып жаткан жеринен кармалды

Биринчи Май райондук ички иштер башкармалыгынын мурдагы аймактык инспектору 10 миң сом акча каражатын алып жаткан жеринен кармалды. Бул тууралуу Бишкек ШИИББинин басма сөз кызматы бүгүн, 5-июнда билдирди.

Маалыматка караганда, 2014-жылдын 30-май күнү милиция кызматкерлерине шаардагы караоке-барлардын биринде иштеген Э.Б. аттуу жаран кайрылган. Анда милиция кызматкери “интимдик кызмат көрсөтөт” деп каттоого аларын айтып коркутуп, 15 миң сом талап кылган. Ошондой эле аталган милиция кызматкери “отметка” катары ар бир 15 күн сайын 10 миң сом берерин айткан. Бул факты боюнча кылмыш иши козголуп, иликтөө иштери башталган. Анын жыйынтыгында 4-июнь күнү Э.Б. аттуу жарандан 10 миң сом акча каражатын алып жаткан жеринен милиция кызматкери кармалган. Ал Биринчи Май райондук ички иштер башкармалыгынын мурдагы аймактык инспектору болгон. 2010-жылдын 30-августунда жаман иштер боюнча жумуштан алынган. Учурда тергөө амалдары жүрүп жатат.