Таластагы көп балалуу энелерге Баатыр эне жана Эне даңкы ордендери берилди

Бүгүн, 10-июнда Талас шаарындагы Атай Огомбаев атындагы музыкалык мектепте Энелер күнүнө арналган салтанаттуу жыйында КРнын Президентинин жарлыгы менен сыйланышкан 253 энеге Баатыр эне орденин жана 88 аялга Эне даңкы медалын тапшыруу аземи өттү. Бул тууралуу КРнын Өкмөтүнүн аталган аймактагы өкүлчүлүгүнүн басма сөз кызматынан билдиришти.

“Учурда жалпысынан Талас облусунда 2892 адам "Баатыр эне" деген жогорку наамды алып жүрүшсө, 780 адам Эне даңкы медалынын ээлери болушкан”,- дейт өкүлчүлүктүн социалдык өнүктүрүү бөлүмүнүн башчысы Нарынбек Токтосунов. 

Аталган жыйынга КРнын Өкмөтүнүн Талас облусундагы ыйгарым укуктуу өкүлү Койсун Курманалиева да катышты.