Караколдо "Кыргыз патенттин" Технологиялык жана инновациялык колдоо борборунун өкүлчүлүгү ачылды

Каракол шаарындагы К.Тыныстанов атындагы Ысык-Көл мамлекеттик университетинин базасында кечээ, 10-июнда КРнын Өкмөтүнө караштуу Мамлекеттик интеллектуалдык менчик жана инновация кызматы ("Кыргыз патент") Технологиялык жана инновациялык колдоо борборунун өкүлчүлүгүн ачты. Бул тууралуу бүгүн, 11-июнда аталган мекеменин басма сөз кызматынан билдиришти.

Маалыматка ылайык, аталган филиалды ачуу жөнүндө макулдашууга "Кыргыз патенттин" жетекчиси Сияпат Батырканова менен Ысык-Көл мамлекеттик университетинин проректору Рысбек Абылгазиев кол коюшту.

“Филиалды ачуунун негизги максаты жогорку сапаттагы илимий-техникалык маалыматтын булагы менен камсыз кылуу болуп эсептелет”,- дейт С.Батырканова.

Ошондой эле "Кыргыз патенттин" адистери тарабынан аталган ЖОЖдун окутуучулары менен студенттери үчүн эл аралык маалыматтык базаны колдонуу менен патенттик маалыматтарды издөө боюнча тренингдер да өткөрүлдү.