Футбол боюнча Дүйнөлүк чемпиондугунун ачылыш аземи болор күнү Рио-де-Жанейродогу 3 эл аралык аэропорттун кызматкерлери көтөрүлүшкө чыгышты

Бүгүн, 12-июнда футбол боюнча Дүйнө чемпиондугунун ачылыш аземи болор күнү Рио-де-Жанейродогу 3 эл аралык аэропорттун кызматкерлери көтөрүлүшкө чыгышты. Бразилиялык "Globo" телеканалынын маалыматына ылайык, "Галеан", "Сантос-Дюмон" жана "Жакарепагуа" Эл аралык аэропортторунун кызматкерлери айлык акыларын көтөрүү талабы менен көтөрүлүшкө чыгышкан. Белгилүү болгондой, бүгүн бул аэропорттордон чемпиондуктун ачылыш аземи өтчү Сан-Паулу шаарына футбол күйөрмандарынын бир бөлүгү учуп кетишмек. 

Эске салсак, жакында Рио-де-Жанейродон полиция тарабынан өлкөнүн Дүйнө чемпиондугун өткөрүүсүнө каршы чыккан "Кара блок" анархиялык уюмунун 17 активисти кармалган эле. 

Маалыматтарда укук коргоо кызматкерлеринин учурда өлкөдө күчөтүлгөн тартипте иш алып барып жаткандыгы айтылууда.