Мамлекеттик айыптоочу экс-мэр Иса Өмүркуловго 8 жыл сурап, айыпталуучуларды сот залынан камакка алууну өтүндү

Мамлекеттик айыптоочу экс-мэр Иса Өмүркуловго 8 жыл сурады. Бул маалыматты 12-июнда сот отурумунда катышкан жаш активист Мавлян Аскарбеков ырастады.

Маалыматтарга караганда, Октябрь райондук сотунда өткөрүлгөн сот отурумунда мамлекеттик жактоочу Иса Өмүркуловду үй-мүлкүн конфискациялоо жана мамлекеттик муниципалдык кызматтарда 3 жылга чейин иштебөө чеги менен 8 жылга эркинен ажыратууну суранган.

Буга катар эле мамлекеттик айыптоочу айыпталуучуларды сот залынан камакка алып, күчөтүлгөн режимдеги колонияда камак күнүнөн тарта жаза өтөө убактысын эсепке алып баштоону өтүнгөн.

Эске сала кетсек, И.Өмүркуловго кылмыш иши 2013-жылдын 2-декабрында козголуп, 4-декабрда мэр өз каалоосу менен кызматтан кеткен. Экс-мэр "Дайыр Асанов атындагы "Жеңиш" сейил багынын чек арасын аныктоодо бир катар мыйзам бузууларга барган" деп күнөөлөнүүдө.