Бразилияда жүргөн Аскар Салымбеков: “Бразилияда ыр-бий өнөрлөрү өзүнчө бир дүйнө”

Бразилия алдыдагы 1 айга чукул убакыт аралыгында дүйнө элинин көңүлүн өзүнө бурдурмакчы. Бул өлкөдө өтүүчү Дүйнө чемпиондугуна аттанган миллиондордун катарында белгилүү футбол сүйүүчүсү Аскар Салымбеков да бар. Учурда Бразилияда жүргөн Аскар мырза SUPER.KG порталынын футбол тууралуу узаткан суроолоруна жооп узатты.

- Аскар мырза, Бразилияга футболго жандуу күбө болуу үчүн аттанганыңыз сыр эмес. Өлкөнүн Дүйнө чемпиондугуна болгон даярдыгын кандай бааладыңыз?

- Эми Бразилиянын калкы футбол менен жашайт эмеспи, элдин маанайы өтө жогору экен. Алар күйөрмандык кылуунун жогорку маданиятын өздөштүргөн калк. Даярдык да мыкты болуптур. 12 стадионду кайра куруп чыгышты. Андан тышкары 170 миңден ашык коопсуздук кызматкерин ишке тартышыптыр.

- Убакытты кандай бөлүштүрүп, эмне кылып өткөрөсүз?

- Азыр ачылыш аземи үчүн даярдалган программага жандуу күбө болуу үчүн азем боло турган стадионго жөнөп баратам. Алардын футболго байланыштуу уюштурган шоусу, ырдап, бийлегендери өзүнчө бир дүйнө. Бүгүн атайын конгресске катыштык. Шаар кыдырууга да убакыт табабыз.

- Саналуу убакыттардан кийин Бразилия менен Хорватия командалары кез келет. Оюн боюнча пикириңиз кандай?

- Бразилия өз үйүндө Дүйнө чемпиондугун акыркы жолу 1950-жылы өткөргөн. Анда финалдык беттеште Уругвайга уттуруп жиберип, өз үйүндө кубоктон куру калган. Бул жолу болсо Бразилия курама командасынын алдына коюлган бир гана тапшырма бар: мелдешти утуш керек. Бул тапшырманы аткаруу үчүн оюнчулар алгачкы оюндан тарта жеңишке жетүүгө тийиш. Мен ойлоп турам, Бразилия жеңет.